ސަރުކާރުން ބަޖެޓް ކަނޑައެޅުމުގައި ޤާނޫނާ ހިލާފްވެއްޖެ ކަމަށް ދަ ޑިމޮކްރެޓްސްއިން ބުނެފިއެވެ. ކުރީގެ ރައީސް މުޙައްމަދު ނަޝީދު އިސްވެ ހުންނަވާ އުފެއްދި ދަ ޑިމޮކްރެޓްސްއިން މިއަދު ޢާއްމުކުރި ބަޔާނެއްގައި ބުނީ ބަޖެޓް ކަނޑައެޅުމުގައި ޤާނޫނާ ހިލާފްވެ, ލާމަރުކަޒީ ނިޒާމްގެ ބާރުވެސް ކަނޑުވާލައިފި ކަމަށެވެ. އެކަން ކުށްވެރި ކުރާ ކަމަށް ބަޔާނުގައި ބުނެފައި ވެއެވެ.solex

ބާރުތައް ފެށިގެން އަންނަނީ ދެމި އޮންނަނީ ރައްޔިތުންގެ ކިބާގައި ކަމާއި, ރާއްޖެ ހިންގަންވާނީ ލާމަރުކަޒީ ނިޒާމުންކަން ޤާނޫނުގައި ކަނޑައަޅާފައިވީ ނަމަވެސް އެ އުޞޫލު ހިފެހެއްޓުމާއި ކުރިއެރުވުމުގައި ދައުލަތުން އިހުމާލުވެފައިވާކަން ބަޔާނުގައި ފާހަގަކުރައްވާފައި ވެއެވެ. ދައުލަތުގެ ބަޖެޓްގެ ޖުމްލަ އާމްދަނީގެ މަދުވެގެން %5 ކައުންސިލްތަކަށް ދޭންވާނެ ކަމަށް ޤާނޫނުގައި ކަނޑައަޅާފައި ވަނިކޮށް, ކަނޑައެޅިގެން ކައުންސިލްތަކުގެ ޤާނޫނާ ހިލާފަށް ކައުންސިލްތަކަށް ހައްގުވާ ބްލޮކް ގްރާންޓުން ވަރަށްބޮޑު މިންވަރެއް އުނިކޮށްފައިވާތީ ޑިމޮކްރެޓްސްއިން ވަނި ކަންބޮޑުވުން ފާޅުކޮށްފައެވެ.

އެކަން ކުށްވެރިކޮށް ޑިމޮކްރެޓްސް އިން ބުނީ ލާމަރުކަޒީ އުސޫލު ކުރިއަރުވާ ބާރުވެރިކުރުމުގެ ޒިންމާއަކީ ވަޒީރަކަށް, ވެރިއަކަށް ނުވަތަ މުއައްސަސާއަކަށްވެސް އޮތް އިހުތިޔާރެއް ނޫން ކަމަށެވެ.

އެއާ ހިލާފަށް އެއީ ދުސްތޫރީ އަދި ޤާނޫނީ ވާޖިބެކެވެ.

ޤާނޫނުގައި ވަކި މުއައްސަސާއަކަށް ވަކި މިންވަރަކަށް ފައިސާ ދިނުމަށް ލާޒިމް ކުރުމުން އެނޫން ގޮތަކަށް ދައުލަތުގެ ބަޖެޓް އެކުލަވާލުމަކީ ސަރުކާރަށްވެސް އަދި ރައްޔިތުންގެ މަޖިލިހަށްވެސް އޮތް ބާރެއް ނޫންކަން ޑޮމޮކްރެޓްސްގެ ބަޔާނުގައި ފާހަގަކުރައްވާފައި ވެއެވެ. ޑިމޮކްރެޓްސްއިން ބުނީ އެއީ ކަނޑައެޅިގެން ޤާނޫނާ ހިލާފް އަމަލެއް ކަމަށެވެ.