ޕީޕަލްސް ނެޝަނަލް ކޮންގްރެސް (ޕީއެންސީ) ގެ އެތެރޭގެ އިންތިޚާބުފަސްކޮށް, އަނެއްކާވެސް އާތާރީޚެއް ދީފިއެވެ.solex

މިމަހުގެ 9 ވަނަ ދުވަހު ބާއްވަން އޮތް ސަރުކާރު ހިންގާ ޕާޓީގެ އެތެރޭގެ އިންތިޚާބަށް މިހާރު ދީފައިވާ ތާރީޚަކީ މިމަހުގެ 23 ވަނަ ދުވަހެވެ. އިންތިޚާބު އަނެއްކާވެސް ފަސްކުރި ސަބަބެއްގެ ގޮތުގައި ބުނީ ޖުމްހޫރީ ދުވަހާ ގުޅިގެން މިމަހުގެ 10 ވަނަ ދުވަސް ސަރުކާރު ބަންދު ދުވަހެއްގެ ގޮތުގައި ރައީސުލްޖުމްހޫރިއްޔާ ކަނޑައެޅުއްވުމެވެ. ހަފްތާ ބަންދާއެކު 4 ދުވަސް ލިބޭ ގޮތަށް 10 ވަނަ ދުވަސް ބަންދުކުރުމުން ގިނަ ބަޔަކު ރަށުން ބޭރަށް ދާނެތީ, ވޯޓްލާ މީހުންނަށް ތަކްލީފް ކުޑަކުރުމަކީ އިންތިޚާބު ފަސްކުރި ސަބަބު ކަމަށް ޕީއެންސީން ބުންޏެވެ.

އިންތިޚާބު ފަސްކޮށްދޭން ކެންޑިޑޭޓުންނާއި, ޕާޓީގެ ގިނަ އަދަދެއްގެ މެމްބަރުން އެދިފައިވާކަންވެސް ޕީއެންސީން ފާހަގަކުރިއެވެ. ޕީއެންސީން ބުނީ ވޯޓާރސް ލިސްޓާއި, އިންތިޚާބު ބާއްވަން ޖެހޭ ދާއިރާތަކާއި, ރަށްރަށާއި ކެންޑިޑޭޓުންގެ ނަންތައް މިމަހުގެ 10 ވަނަ ދުވަހު އިއުލާނު ކުރާނެ ކަމަށެވެ.

ޕީއެންސީގެ އިންތިޚާބުގައި ދާއުރާގެ ރައީސުންނާއި ނައިބުރައީސުންގެ އިތުރުން ޒުވާނުންގެ ރައީސްއާއި އަންހެނުންގެ ރައީސް އަދި ކޮމިޓީތައް އިންތިޚާބު ކުރާނެއެވެ. ދާއިރާތަކުގެ ރައީސުންގެ އިންތިޚާބު ބާއްވަނީ ރައްޔިތުންގެ މަޖިލިހުގައި އެޕާޓީގެ މެމްބަރުން ނުހިމެނޭ ދާއިރާ ތަކުންނެވެ. އެޕާޓީގެ މަޖިލިސް މެމްބަރުން ހިމެނޭ ދާއިރާތަކުގެ ރައީސުންނަކީ އެމެމްބަރުންނެވެ.