ރައީސުލްޖުމްހޫރިއްޔާ ޑރ.މުހައްމަދު މުއިއްޒު ފަލަސްޠީނުގެ ރައީސް ޑރ.މަހުމޫދު ޢައްބާސްއާ ބައްދަލުކުރައްވައިފިއެވެ. ރައީސް މުއިއްޒު ފަލަސްޠީނުގެ ރައީސްއާ ބައްދަލުކުރެއްވީ އދ.ގެ ޢާއްމު މަޖިލިހުގެ ބައްދަލުވުމަށް ވަޑައިގެން, ހަވާސާގައެވެ. ރައީސުލްޖުމްހޫރިއްޔާ ވަނީ ރާއްޖޭގެ ރައްޔިތުންގެ ފުރިހަމަ ސަޕޯރޓް އަބަދުވެސް ފަލަސްޠީނުގެ ރައްޔިތުންނާއެކު އޮންނާނެ ކަމުގެ ޔަގީންކަން ދެއްވާފައެވެ. އަދި ކޮންމެ ތަނެއްގައިވެސް ދިވެހިން އަޑުއުފުލާނީ ފަލަސްޠީނުގެ ރައްޔިތުންގެ ހައްގުގައި, ފަލަސްޠީނުގެ ދިފާއުގައި ކަމަށް ރައީސުލްޖުމްހޫރިއްޔާ ވިދާޅުވިއެވެ. ފަލަސްޠީނުގެ ރައީސް މަހުމޫދު އައްބާސް ވިދާޅުވީ ދިވެހިރައްޔިތުންގެ ސަޕޯރޓް އަބަދުވެސް ފަލަސްޠީނާއެކު އޮތްކަން އެނގިވަޑައިގަންނަވާ ކަމަށާއި, އެކަމަށް ޝުކުރު އަދާކުރައްވާ ކަމަށެވެ.solex

އިޒްރާއީލުން ފަލަސްތީނަށް ދެމުންގެންދާ ހަމަލާތައް ހުއްޓުވުމަށް ބައިނަލްއަޤްވާމީ އެހީތެރިކަމަށް ފަލަސްޠީނުގެ ރައީސް ވަނީ އެދިވަޑައިގެންފައެވެ.

ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވީ ދިވެހިން އަބަދުވެސް ބޭނުންވަނީ ފަލަސްޠީނު މިނިވަން ގައުމެއްގެ ގޮތުގައި, މިނިވަން ދައުލަތެއްގައި ގޮތުގައި އޮތުން ކަމަށެވެ. ރައީސް ވިދާޅުވީ ދިވެހިން އަބަދުވެސް ފަލަސްޠީނާއެކު ތިބޭނެ ކަމުގެ ޔަގީންކަން ދެއްވި ކަމަށެވެ. ދެ ރައީސުންވަނީ ދެގައުމުގެ ގުޅުމާ ގުޅޭގޮތުންވެސް މަޝްވަރާ ކުރައްވާފައެވެ.

ފަލަސްޠީނަށް އެހީވުމަށް ރައީސް މުއިއްޒު އިސްނަންގަވައިގެން ޕީއެސްއެމްއިން ވަނީ ބޮޑު ޓެލެތޯނެއްވެސް ކުރިއަށް ގެންގޮސްފައެވެ. އެޓެލެތޯނުން 19 މިލިނަނަށްވުރެ ގިނަ ރުފިޔާ ހޯދިއެވެ. އަދި ޒަކާތު ފަންޑުން ފަލަސްޠީނަށް އެހީ ހަވާލުކުމުގެ މަސައްކަތްވެސް ދަނީ ކުރަމުންނެވެ.