ވިޔަރެއާލް އަތުން ބޮޑު މޮޅެއް ހޯދައިގެން ސްޕެނިޝް ލަލީގާ ތާވަލްގެ އެއްވަނައިގައި ބާސެލޯނާއިން ހަމަޖެހިލައިފި އެވެ. ވިޔަރެއާލްގެ މައްޗަށް ބާސެލޯނާ ކުރިހޯދީ 5-1 ނެވެ. solex

މެޗުގައި ބާސެލޯނާގެ ފުރަތަމަ ދެ ލަނޑު ޖެހީ ލެވަންޑޮސްކީއެވެ. އަދި ފަހު ދެލަނޑު ޖެހީ ކެޕްޓަން ބޭންޑް އަޅައިގެން ކުޅުނު ރަފީނިއާއެވެ.

ލެވަންޑޯސްކީ ބާސެލޯނާއަށް ލީޑް ނަގައިދިނީ 20 ވަނަ މިނިޓްގައި ޕަބްލޯ ޓޯރޭ ތަނަވަސް ކޮށްދިން ފުރުޞަތެއްގައެވެ. ދެވަނަ ގޯލް ކާމިޔާބުކުރީ އޭގެ ފަނަރަ މިނިޓް ފަހުންނެވެ.

ފުރަތަމަ ހާފް ނިމުމުގެ ކުރިން އަޔޯޒޭ ޕެރޭޒް ލަނޑެއް ޖަހާ ވިޔަރެއާލް އަށް ފަރަގު ކުޑަކޮށްދިނެވެ. އެއީ ކައުންޓަރ އެޓޭކެއްގައި ނިކޮލަސް ޕެޕޭ ތަނަވަސްކޮށްދިން ފުރުޞަތެއްގައި ލަނޑު ޖަހައިގެންނެވެ.

ބާސާގެ ތިންވަނަ ލަނޑު ދެވަނަ ހާފްގެ ކުރީކޮޅު ޖެހީ ޕަބްލޯ ޓޯރޭ އެވެ.

ރަފީނިއާ ލަނޑު ޖެހުމުގެ ކުރިން ބާސާއަށް ލިބުނު ޕެނަލްޓީއެއް ލެވަންޑޯސްކީ އަތުން ނާކާމިޔާބުވިއެވެ. ލަމީން ޔަމާލްއަށް ވިޔަރެއާލްގެ އެރިކް ބެއިލީ ކުރި ފައުލަކާ ގުޅިގެން ދިން ޕެނަލްޓީ ރޮބަޓް ލެވަންޑޮސްކީ ފޮނުވާލުމުން އަމާޒުވީ ގޯލްގެ ދަނޑިއަށެވެ.

މެޗުގައި ބާސެލޯނާގެ ފަހު ދެ ގޯލް ރަފީނިއާ ޖެހީ 74 ވަނަ މިނިޓާއި 83 ވަނަ މިނިޓްގައެވެ.

މި ނަތީޖާ އާއެކު ބާސެލޯނާ އެއްވަނައިގައި އޮތީ 18 ޕޮއިންޓާއެކުއެވެ. ވާދަވެރި ރެއާލް މެޑެރިޑް ދެވަނާގައި އޮތީ 14 ޕޮއިންޓާއެކުއެވެ.