ޕްރޮސެކިއުޓަރ ޖެނެރަލް (ޕީޖީ) ގެ މަގާމުން ހުސައިން ޝަމީމް ވަކިކުރުމުގެ ބަހުސް ކުރިއަށް ދަނިކޮށް, އިސްތިއުފާ ދެއްވުމަށްފަހު ރަތް ދޫލައިގެ އަލްވަދާއު އެއްގައި އޭނާ އޮފީހުން ނިކުމެވަޑައިގެންފިއެވެ. solex

ޕީޖީގެ މަގާމުން ހުސައިން ޝަމީމް ވަކިކުރައްވަން މިއަދު ރައްޔިތުންގެ މަޖިލިހުގެ ޖުޑިޝަރީ ކޮމިޓީން ފާސްކޮށް, މަޖިލިހުގެ ތަޅުމަށް ހުށަހެޅިއެވެ. ރައްޔިތުންގެ މަޖިލިހުން މިރޭ ޖަލްސާއެއް ތާވަލްކުރީ ހަމައެކަނި ޕީޖީގެ މަގާމުން ޝަމީމް ވަކިކުރެއްވުމުގެ މައްސަލަ އެޖެންޑާ ކުރުމަށްފަހުއެވެ. އެޖަލްސާ ކުރިއަށް ދަނިކޮށް, ޝަމީމް ވަނީ އިސްތިއުފާ އިއުލާނުކުރައްވާ ރަތް ދޫލައިގައި އޮފީހުން ނިކުމެވަޑައިގެންފައެވެ އެއޮފީހުގެ މުވައްޒަފުން ރަތް ދޫލައިގެ ދެފަރާތުގައި ތިއްބަވައިގެން ތަރުހީބު ދެއްވިއެވެ.

ޕީޖީ ޝަމީމް ވަކިކުރެއްވުމަށް ކޮމިޓީން ނިންމަވާ އޭގެ ރިޕޯރޓް ތަޅުމަށް ހުށަހަޅުއްވަމުން ކޮމިޓީގެ މުގައްރިރު ވިދާޅުވީ މަގާމާ އެކަށީގެންނުވާ އަމަލުތައް ޝަމީމްގެ ފަރާތުން ފެނިފައިވާ ކަމަށެވެ. އަދި ކޮމިޓީގެ އަގްލަބިއްޔަތުން ޝަމީމް ވަކިކުރައްވަން ނިންމެވީ ކޮމިޓީގައި ޖަވާބުދާރީ ވުމަށް ދެއްކެވި ވާހަކަތަކަށްވެސް ރިއާޔަތްކުރެއްވުމަށް ކަމަށެވެ. ބަހުސްގެ ފުރުޞަތު ހުޅުވާލެއްވުމުން އެމްޑީޕީގެ ޕީޖީ ލީޑަރު ހިތަދޫ ދެކުނު ދާއިރާގެ މެމްބަރު އިބްރާހީމް ނާޒިލް ވިދާޅުވީ ޝަމީމް ޖަވާބުދާރީ ވުމަށް ބޭއްވި ކޮމިޓީ ބޭއްވީ ގަވާއިދާ ހިލާފަށް ކަމަށެވެ. އެކޮމިޓީ ސިއްރު ނުކުރެވޭނެ ކަމަށް ވިދާޅުވިއެވެ. އެކަމަކު އެކަން ދޮގުކުރައްވާ ކޮމިޓީ މުގައްރިރު ވިދާޅުވީ ކޮމިޓީ ބޭއްވީ އުސޫލުތަކާއި އެއްގޮތަށް ކަމަށެވެ. ގަވާއިދާ ހިލާފްވެފައި ނުވާނެ ކަމަށް ވިދާޅުވިއެވެ.

ޝަމީމް އިސްތިއުފާ ދެއްވި ނަމަވެސް އެކަން ރައީސުލްޖުމްހޫރިއްޔާގެ އޮފީހުން ރައްޔިތުންގެ މަޖިލިހަށް އަންގަވާފައި ނުވާތީ ތަޅުމުގައި ބަހުސް ދަނީ ކުރިއަށެވެ.