ބިދޭސީންގެ ޖޫރިމަނާ މިމަހުގެ ނިޔަލަށް ނުދައްކައިފި ނަމަ އެކްސްޕެޓް ސިސްޓަމުން ސަސްޕެންޑް ކުރަން ނިންމައިފި އެވެ. solex

މިނިސްޓްރީ އޮފް ހޯމްލޭންޑް ސެކިއުރިޓީ އެންޑް ޓެކްނޮލޮޖީ މިނިސްޓްރީން މިރޭ ޢާއްމުކުރި އިއުލާނެއްގައި ބުނެފައިވަނީ ބިދޭސީންނާ ގުޅޭ ޖޫރިމަނާ ފައިސާ ދައްކަން އޮތް ފަހު ފުރުޞަތަކީ މިމަހުގެ 31 ވަނަ ދުވަހުގެ ނިޔަލަށް ކަމަށެވެ. މީގެކުރިން މިނިސްޓްރީން ވަނި މިމަހުގެ 12 ވަނަ ދުވަހުގެ ނިޔަލަށް ފުރުޞަތު ދީފައެވެ. އޭރު ފުރުޞަތު ދިނީ ނުދައްކާ އޮތް ފައިސާ އެއް ލައްކައަށްވުރެ މަތިވެފައިވާ ކުންފުނިތަކުގެ ލިސްޓާއެކުއެވެ.

އެލިސްޓް މިނިސްޓްރީން ޢާއްމު ކުރުމުން 20 ކުންފުންޏަކުން ވަނީ ފައިސާ ދައްކާފައެވެ. ފައިސާ ދެއްކި ކުންފުނިތަކުން ދެއްކި ފައިސާއާއެކު ޖުމްލަ 182،954،572 ރިކަވާ ކުރެވިފައިވާ ކަމަށް މިނިސްޓްރީން ބުންޏެވެ. މިނިސްޓްރީން ވަނީ ޖޫރިމަނާ ފައިސާގެ އަދަދު ލައްކައަކަށްވުރެ ބޮޑު 200 އަށްވުރެ ކުންފުނީގެ ނަން އިއުލާނުކޮށްފައެވެ. އަދިވެސް ގިނަ ކުންފުނިތަކުން ފައިސާ ނުދައްކައެވެ.

މިނިސްޓްރީން ބުނީ ދިވެހިރާއްޖޭގައި ވަޒީފާ އަދާކުރާ ބިދޭސީންނާއި ގުޅިގެން ދައްކަންޖެހޭ ފައިސާ މިމަހުގެ 31 ގެ ކުރިން ނުދައްކާ ފަރާތްތައް އެކްސްޕެޓް ސިސްޓަމް އިން ސަސްޕެންޑްކޮށް ޚިދުމަތް މެދުކަނޑާލާނެ ކަމަށެވެ. ބިދޭސީންނާ ގުޅޭ ޚިދުމަތްތައް ދެނީ އެކްސްޕެޓް ސިސްޓަމްގެ ތެރެއިންނެވެ.

މިސަރުކާރުގައި އިމިގްރޭޝަންގެ ބެލެނިވެރި ފަރާތަކީ ހޯމް މިނިސްޓްރީ އެވެ.